COVID-19 Pinasuartumik ikiorsiissutit

Naalakkersuisuts Inuutissarsiortunut ikiuniarluni aaqqissuussaa Greenland Businessimit aqunneqassaaq. 

 

Naalakkersuisut Greenland Business piumaffigisimavaa inuutissarsiortunut ikiuiniarluni aaqqissuussamut qinnuteqarnerup agguaanerullu aqunnissaanik. Ikiuiniarluni aaqqissuussaq marlunnik immikkoortortaqarpoq: Pinasuartumik ikiorsiissutit unnuisarfinnut, neriniartarfinnut kiffartuussinermillu suliaqartunut, suliffeqarfiit taakku massakkut aningaasatigut ajornartorsiulereerput inniminnikkanik taamaatitsiinnarnerit Kingunerisaanik suliffeqarfinnillu pinngtsaalisaallutik matusariaqarsimasunut taavalu Suliffeqarfinnut tamanut atuuttoq suliaqarfinni allani ajornartorsiutinut ikiorsiissutaasussaq.

 

Greenland Business periutsit ullumikkut atukkani ikiorsiissutinut aqutsinissamini atorsinnaavai. Taamaattumik qinnuteqaatit ataasinngorpat nal. 12.00-miit tigooralereerneqarsinnaapput Suliarinerilu sukkasuumik ingerlasinnaapput. Massakkuugallartoq oqaatigisinnaanngilarput qanoq sukkatigissanersoq, qinnuteqartut amerlassusaat ingerlaneranilu apeqqutit Naalakkersuisut peqatigalugit akineqarsinnaasut qanoq amerlatigisut takkukkumaarnersut apeqqutaajumaarmat.

 

Aallaqqaammut martsimi kaaviaartitanik annaasaqarnermut aningaasartuutinullu aalajangersimasunut qinnuuteqartoqarsinnaavoq. 

 

Qinnuteqarnermi immersugassaq nittartakkami innovation.gl aaneqarsinnaavoq. Immersugassaq ajornanngitsumik immersorneqarsinnaanngorlugu sananeqarnikuuvoq taamaalillunilu nalilersuineq ajornanngitsumik ingerlanneqarsinnaassalluni.

 

Qinnuteqarnermi piumasaqaatit naammassineqartussat arlaqarput. Piumasaqaatit quppersakkami aamma takuneqarsinnaapput taakkununnga paasissutissat allat ilanngullugit aamma atuarneqarsinnaapput.

 

– Pisinnaasarput tamaat qinnuteqaatit sukkasuumik suliariniassavagut aammalu piareersimassaagut apeqqutissaqartoqassappat akinissatsinnut Christian Wennecke Greenland Business-mit oqarpoq: – Neriuutigaarpulli eqqaamaneqassasoq piffissaq manna atugarput arlarluinnaammat. Ingerlaarnitsinnilu pinngitsoorani apeqqutissaqartoqartarumaarpoq ingerlaannaq akisinnaanngisatsinnik taamaattumik neriuppugut paasinnikkumaartusi naggasiivoq.

 

GREENLAND VENTURE
Atuaruk
INNOVATION GREENLAND
Atuaruk
GREENLAND HOLDING
Atuaruk
GREENLAND HOLDING A/S · Boks 1434 · 3900 Nuuk · Grønland · CVR 11 81 31 27
;